1
रै चाल जीवड़ा,उठा फावड़ो,खेतां खानी कर मूंडो
बो मेह तरसै,मैं रोटी नै,है दोन्यां रो सुखो मूंडो.......
हूं सुणी गांव रा टाबरिया शैरां में लूंठा सेठ बजै
अमरीको रेवै पगां तळै,बै उंचा चढ्या बै ओर बढ़ै
गाडी-घोड़ा नोकर-चाकर,सुख सगळा बैंकै भागां में
म्हे देखूं हूं जद बांखानी,तो लागूं मैं खुद नै भुंडो
रै चाल जीवड़ा,उठा फावड़ो,खेतां खानी कर मूंडो........
कुंवर प्रीतम

2
मावड़ली नै मान दिरावण रो संकल्प करां सगळां
आपसरी री बातां सावळ,निज बोली में करां सगळां
जैपर अर दिल्ली में बैठ्या भी चेतैला काल कुंवर
इंगरेजी रो कोड छोड,खुद कायाकल्प करां सगळां
कुंवर प्रीतम

3
जल्म्यो भाया रेतभौम पर,क्यूं इणनै बिसरावै रै
चपर-चपर इंगरेजी बोलै,अर मायड़ अल्डावै रै
राम घणो ई राजी थां पर,गाडी-घोडा सगळा छै
पुरखां रै आंगण री भाया,क्यूं ना ओळ्यूं आवै रै
कुंवर प्रीतम

4
इनली-बीनली गोयां में क्यूं टैम करै खोटी भाया
निकमां बैठ्योड़ानै जग में कुण घालै रोटी भाया
काम बगत सर कर लैणो,निकमो टैम गंवांणो नीं
काम काल रो आज सार लै, उमर घणी छोटी भाया
कुंवर प्रीतम