सुणो भायळां,कानां में एक बात बताऊं स्याणी
बिनां बुलायां गयां सासरै,समझो नाक कटाणी
लुक्खा रोट जिमावै,अर दै लोटो भर-भर पाणी
माचो घालै लंगड़ियो,सै बूंआ घर की स्याणी
जियां-तियां दिन बितै सिंझ्यां मुंडो फेर सुजावै
आपसरी में सैन करै,ओ डाक्यां जियां खावै
नूंवां-नूंवा जद परणीज्या,ही जोरदार मनुवार
दूध ल्यावता सासू जी कर केसर री बौछार
रात ढल्यां सोयां पेली,मनुवारां ओर घणी होती
लाड लडाती बातां करतीं पछै बूआं सगळीं सोतीं
लेकिन भाया टैम बदळग्यो,कठै रेयी मनुवार
मावस-पुन्यू भेळी कर दै,बुआं घणी हुंस्यार
दुखै माथो एक जणी को,दूज्योड़ी रो नाक चढ्यो
नखरा देख ध्याय भैंरूं ने मैं तो बैरंग घरै बढ्यो
कह्वै कवंर थे बिना बुलायां सासरियै मत जाया
लाडकोड नै न्हाखो छेड़ै, नाक कटै ली भाया
कुंवर प्रीतम
0 comments:
Post a Comment