जीवन व्यर्थ गंवाई मत

करसी जिस्यो भरसी भाया,जीवन व्यर्थ गंवाई मत
चादर जित्तोई पग फैलाई,ज्यादा पण फैलाई मत

खोटो टैम चालै लाडी,सगळा भागै पिस्यै लारै
भाया तूं समाई राखी,मिनखपणो गंवाई मत

बडा-बडा फ्लैट बण्या पण,मां-बापां नै वृद्धाश्रम
आपणी छात टूट्योड़ी चोखी,बिस्यो घर चिणाई मत

लाम्बी-लाम्बी डिग्रयां खातर,टाबर नै बिदेस भेजै
सैंस्कार भुलावै जकी,टाबरां नै पढ़ाई मत

मैं तो कीं जाणूं नीं, मिल्योड़ी सीख तन्नै दे दी
मानै तो घणी चोखी,नीं मन्नै तो पजाई मत

-कुंवर प्रीतम